30元放題

30元放題 超抵 茶餐廳任食 排四句鍾


30元放題 首創「30元任食放題」被網民大讚的肥嘟嘟茶餐廳，經報章大篇幅報道，再在網上討論區瘋傳，人氣急升，勁多人去食，更加要排四句鍾先得別，真係誇張到爆。



相: 30元放題

茶餐廳推$30任食救亡　老闆：除笨有精
(節錄轉載) 荃灣一家「肥嘟嘟茶餐廳」上周五（1日）全港首創茶記「放題」，30元任食，成為網上熱門話題之一，有食客專誠從旺角走去幫襯。這間茶餐廳因早前抵受不住 業主狂加租，大舖搬細舖，但人流不足及競爭大，生意依然難做。一對年輕老闆盡地一煲，企圖靠新噱頭突圍，能否成功仍是未知之數，但已贏盡宣傳功效。

「係咪咁抵，30蚊任食？」在海濱花園海霞閣的「肥嘟嘟茶餐廳」門口廣告，途人投以半信半疑目光。身兼股東的餐廳經理鄺小姐表示，早年原在屋苑開設一間過 千呎茶餐廳，去年業主將租金由2萬加至5萬元，於是搬到現址400餘呎小店經營，租金2萬元，她坦言去年中開業至今，生意一般，「呢區比較靜，好少新 客」。

她表示，不少客人是裝修及地盤工，胃口大，經常要求加飯，「一個碟頭飯連飲品都要25蚊，不如大家畀多幾蚊，我哋就任食益街坊」。

營業額增加兩成
鄺小姐和另一男股東商量後，決定推出放題任食，結果生意有起色，營業額增加兩成，帶旺午市、茶市及晚市；至於會否擔心遇上「大胃王」，她說：「唔擔心，有人食多，有人食少，除笨有精。」

這間茶記放題主要分為兩大類，一種是30元，除招牌巨型大雞髀及小菜套餐外，其他菜式任食，並包一杯飲品。至於60元的放題，即不設限制，所有菜式任食任 飲。記者現場所見，下午茶時間，店內已坐了20多人，連門口也須加枱，有食客大叫特叫，滿桌食物，頂着肚腩而去，豎起拇指大讚。

鄺見新招似乎殺出血路笑逐顏開，指以前經營難，兩個股東賺一份人工，攤開條數以「坎坷」來形容，原來該餐廳營業額約6萬元，租金2萬元、大廚2萬元、外賣 男工8、9千元、水電費近4千元及食材過萬元，未計兩名股東的人工已超過6萬，完全「倒蝕」及慘過打工。鄺指放題能否起死回生仍有待觀察，只希望能生存落 去。

種類繁多炒小菜最貴
茶記「放題」究竟有乜食？30元任食的有沙薑雞飯、乾炒牛河、涼瓜排骨飯、五香肉丁公仔麵及火腿煎雙蛋拼薯餅等，送一杯飲品包括紅豆冰及利賓納等。60元任食放題則是餐牌上的食物任飲任食，包括最昂貴的小菜套餐，部份菜式如椒鹽雞丁、蒸釀豆腐、咖喱豬扒及菜遠牛肉等。