活佛viva

活佛viva

噚晚講到近日喺FB瘋傳嘅「佛教流行音樂概念大碟」《罪與佛》，雖然隻碟係假嘅，但網民就玩真嘅，密密「啤」返啲歌出嚟，好似《活佛VIVA》、《Buddha California》同《唸經36小時》已經有得聽!一班高登網民真係當正自己係唱片公司咁，係咁「車」啲歌詞出嚟，務求真係填滿晒成隻碟，啲歌詞仲要好多都填得唔錯，邊個話香港人冇創意呢?

---

---

不過講到尾，最搶鏡始終係封面嗰位貌似龍心同謝霆鋒嘅和尚，令呢隻「概念大碟」形象化到不得了，原來碟係惡搞，但呢位和尚係真嘅，不過佢法號唔係Magic Pro，而係叫「釋道心」，仲潮到不得了，有「潮僧」同「佛門謝霆鋒」之稱。
 
82年出世嘅釋道心，仲要16歲已經出家，依家係蘆山清蓮精舍主持，仲真係有出碟，叫《慈航遠渡》，08年出嘅，搞埋自己嘅音樂室，真係非一般嘅和尚!佢個樣似足龍心同謝霆鋒，有自己微博，成日戴住副黑框眼鏡，仲會扮cute嘟嘴賣萌，佢知道最新fb瘋傳佢張相，喺微博話:「海外的朋友發給我。說最近我的圖在Facebook上很火？尤其是在香港！」然後回人哋留言仲話:「別人的唱片，用了我的圖片!」真係唔忍心話佢知其實只係人哋惡搞喎。

其實釋道心嘅風評就麻麻哋啦，啲人就話佢俾人逐出佛門，真定假就唔知，不過釋道心啲日常生活一啲都唔靜心，見佢微博不時周圍去，有時仲去Starbucks嘆咖啡，咁難捨棄世俗，點解要出家呢?

 【二次創作】網友真係創意無限，竟然將謝霆鋒舊歌《活着Viva》惡搞二次創作，改咗歌名做《活佛Viva》，歌詞仲好鬼抵死：「年輕得剃度誰亦能像波惹般乾脆，快活到半日也像活佛一百萬歲」，噚日連YouTube都有歌聽㖭。

網友將周星馳同劉以達「夢遺大師」嘅《食神》片段、葉子楣喺《富貴開心鬼》俾和尚兜巴星嘅片段剪接成MV，笑到噴飯。